2023 පහ වසර ශිෂ්‍යත්ව විභාගය සමත් සේවා නියුක්තයන්ගේ භාර අරමුදල් මණ්ඩලයේ සාමාජිකයින්ගේ සියලුම දූ පුතුන්ට අපගේ උණුසුම් සුභ පැතුම්!

පහ වසර ශිෂ්‍යත්ව විභාගයෙන් සමත්වන අරමුදලේ සක්‍රීය සාමාජිකයන්ගේ (දෙමව්පියන් කවරෙකුගේ හෝ) දරුවන් වෙනුවෙන් ශිෂ්‍යත්ව පරීක්ෂණයේදී ලබා ගන්නා ලකුණු සැලකිල්ලට ගනිමින්  දරුවන් 9000 ක් සඳහා රු.15,000/- බැගින් වූ මූල්‍ය ප්‍රදානයන් පිරිනැමීම සදහා අයදුම්පත් භාර ගැනීම ආරම්භ කර ඇත. මෙවර මුද්‍රිත අයදුම්පත් නිකුත් නොකරන බැවින් මාර්ගගත අයදුම්පත (online application) ලබා දී ඇති උපදෙස් අනුව සම්පූර්ණ කරන ලෙස දන්වා සිටිමු. අයදුම්පත් භාරගන්නා අවසන් දිනය 2024 ජනවාරි 12 වේ.

මාර්ගගත අයදුම්පත සම්පූර්ණ කර අප වෙත ඉදිරිපත් කිරීමේදී (Submit) සේවා යෝජක විසින් සම්පූර්ණ කල යුතු ආකෘති පත්‍රය  හා අනෙකුත් ලියකියවිලි උඩුගත කිරීමට ඇති බැවින් පහත දක්වා ඇති උපදෙස්  අංක 1 හා 2 ට අනුව අයදුම්පත ඉදිරිපත් කරන්න

1. අයදුම්පත සම්පූර්ණ කිරීමට ප්‍රථම සේවා යෝජක විසින් සම්පූර්ණ කළ යුතු ආකෘති පත්‍රය භාගත කර දරුවා විභාගයට පෙනී සිටින අවස්ථාව වන විට  සේවය කල ආයතනයෙන් සම්පූර්ණ කරගත යුතුය.
2. උපදෙස් පත්‍රිකාවේ දක්වා ඇති ඉදිරිපත් කල යුතු ලියවිලි සමග සේවා යෝජක සම්පූර්ණ කල ආකෘති පත්‍රය පරිලෝකනය (Scan) කර PDF ගොනුවක් සකසා ගත යුතුයි. එම ගොනුව ETF  සාමාජිකයාගේ ජාතික හැදුනුම්පත් අංකයට Rename (නැවත නම්කර) කර ගත යුතුය.